TARO NANGO DROM KOTE TE DZAS AMEN

 

TARO NANGO DROM KOTE TE DZAS AMEN
 
08/02/2012 - Von pharaven khera, chuden amen e dizendar, sar ki Italia, sar amende da ki Anglia.
Tumen e Francijatar, e Garmenijatar palden, palpale ki Romania, vi ko Kosovo.
 
Akate ano Dale Farm pinda kherora hasarde. Chingar kerdas olensa. Seranda dzene astardile sine.
Nekobor ka dzan ko phandipe. Akana e daja, pe chavorensa, achen avri beshindor ko shudro drom e vurdonensa.
 
Dzanas kaj bute themende agjahar e neve-fashistora maren e Romen, e Pirutnen. Sakote o rasizmo bajrola.
 
Kote te dzas amen? Pale te nashas akale bi-ileskere gadzendar?
 
Ma! Amen sam manusha, but manusha; ki sasti Evropa desh-u-dui miliona.
 
A sar te sikhas olen amaro jekhipe, hem taro jekhipe t’ovel nevo zuralipe?
 
I Romani himna Dzelem Dzelem vakjerel amen so te keras. Ki gili savi o Zarko Jovanovic Jagdino 
hramosardas ko Angluno Romano Kongreso ano London 1971 bersh ov phenel Ushten Romalen!
 
Kana? Akana ko Romano Themutno Dives.
 
Bijando taro Angluno Kongreso, o seranda-jekhtato Romano Themutno Dives ikarel pes ko Purano Kurko 8 aprili.
 
O baro dives kerena shov-var-deshe themende, sakote maladjovas e Romensa, na salde ani Evropa, a tari Argentina dziki Australia.
 
Baktales, isi amen but shel kedipa, Romane organizacia sake dizate, masharthemengo komiteto ane Strasburgo hem Brussels.
Ko interneto dosta websitora isi save barbari sar virtualno Romanestan ulo.
 
Phralalen, shaj san dzeno ERTFesko, e IRUesko, vi aktivisti e neve ERUeskero, e SOResko; shaj san dzeno nesavo dizutno kedibasko.
Shaj ashunen e ERIOestar. Sar jekh! Kedin jekhethanes.
 
Sar e manusha ano Egipat akana ushtile, sar amen da ka ushtas.
Varesavo tumaro beshibasko than, ikljoven e mahalatar, e kampingestar, e gavestar. Ikljoven! Keden avri ko drom. Roden tumare hakija! Palden e neve-fashistoren. Keren ko 8 aprili baro strajk!

Link: http://www.romabuzzmonitor.net/2012/02/from-the-bare-road-where-can-we-go/